مصر.. في عيوني

مصر.. في عيوني
يا مصر......فات الكتير
من عمري باقي.. قليل
شُفت العـذاب والهنـا
وصراع قابيل.. وهابيل
شفت اللي شاف..جنته
في عـِشه..جنب النيل
واللي نسج..... فرحته
بالشعر... والمواويـل
واللي شكي.... عـِلته
بالدمع في المنــاديل
واللي عشان...لـُقمته
سافر مع...التراحيـل
واللي عايشها ....كده
سايبها...للتساهيــل
شفت اللـي حّب وكتب
أشواقه...في المراسيل
واللي في ساعة عَـتب
بيقول بلاش العـِـتاب
ويغني ساعة ..صفـا
للضي....والقنــاديل
*****
وقريت نجيب ال" نجيب "
في العطفه..والحــاره
في وصف مصر البديع
بالدقـه..والتفصيــل
وحميده جوا الزقــاق
ورموشها..سنـــّاره
وقلوب حياري ..تدوب
في رنـّـة الخلاخيـل
و"أمينه " رهن الإشاره
واللا..سي السيـّــد
حاكم بأمره..وعن حكمه
إستحاله..تميــــل
إحسان ويوسف وحَـقي
ومبدعين...غيرهــم
صنـُاع حضاره تفوق
الموميا ..والتماثيــل
*****
شُفت الزعيم...البطـل
في ساعــة.. العُسره
شُفت الدموع اللي تقتل
جـّد...مش تمثيــل
وشُفت كـُــل العرب
ملمومه ..في أسُــره
عشمانه في ربّهـــا
بالحمــد... والتهليل
صوتها يرج الوطـن
م النوبه..للبصــره
يضرب أوربـا الفزع
ويهز....إسرائيـــل
في القدس...في يافـا
في نابلس..في الناصره
حق الشعوب اللي ضاع
بالكدب.... والتضليـل
لازم ها يرجع في يوم
العـِز..والنـُصــره
زي ما قال ربنــــا
في مـُحكم..التنزيــل
ونشوف " عدو الحياه"
في الذل..والحســـــره
زي ما شـُفنا الآيـات
في أبرهه..والفيـــل
*****
وشُفت يوم العبـــور
يوم إنتصار ..أُمـّــه
شـُفت الجنود البواسل
وسطـهم..جبريـــل
يوم إفتخـــار العرب
كان ع العدو....غُمـه
وتاريخ جــديد إتنقش
في الصخر..بالأزميـل
إحنا ..دُعــاة السلام
واللي إعتدي..هُمـّـه
والصاع صاعين في الميدان
وصراع ما بيننا طويل
والحق راجــع مادام
في عزمنا..هِمـــه
وإراده حـُــــره
بتتورث لجيل عن جيل
*****
يا مصر......فات الكتير
من عمري باقي.. قليل
شُفت اللي باع ذِمتــه
بالرقص..والتطبيــل
واللي ســرق..حِجته
حِمل الغلابه....تقيــل
واللي قتـــل..حِكمته
إقتل..يا تبقي..... قتيل
شُفت الكبير..مبــدأه
شَيـّل..يا عـم وشيل
أصل اللي حاكم ..حَـكم
بالظلم ..والتهويـــل
حواليه شويـــة غفر
يضربنا..بإيديهـــم
هـُما..أعـــزّه وشافوا
إن إحنا .. شعب ذليل
خير البلد مِلكــــهم
وإحناعبيد ..فيهـــا
تـُسترنا عـِشه خشب
وشوية..الهلاهيـــل
وشُفت يـوم..ثورتـِك
ع الظـُلم ..في ينـاير
كان نصر من ربنــا
في يوم مالوهش مثيل
سـُني وشيعي..مسيحي
كُلهم..واحــــــد
جوا الميــدان إترفع
قـُرآن...مع إنجيـل
وشُفت مصر الجديده
لابسه..توب تُــللي
حِـــلوه صلاة النبي
في الطــرحه..والإكليل
وشوفنا جيشنا العـريس
حامي حـِما....بلــدي
والزفــه ....بالبسمله
والزفّــــه بالتراتيل

*****
عدّت..علينا سنــــه
واللي حصـــل فيها
لو هأكتبه..هأكتبـــه
بالدمع في كشاكيـــل
شُفت الكتير يابلــــد
ما كرهتش إني بأشوف
غير أما شُفت البرادعي
وسِـِته من إبريـــل
*****